方舟台

除咗打game，捉棋係又平又好玩嘅活動 — 尤其係成班老友湊熱鬧。

大情大性之人，最鍾意飛行棋，尤其打沉人哋D飛機最痛快! 自卑感重嘅人，玩鬥獸棋又幾勵志，事關過街老鼠都可以打嬴大笨象。捉海陸空戰棋最刺激，大家遮住，分分鐘總司令撞地雷﹗都好，教識我哋做人唔好太沙塵，戰棋嘅排名係「總、軍、師、旅、團、營、連、排、工」，但係棋盤上仲有「地、炸」(地雷、炸彈) ，可以攞命。

凡事想來想去、九曲十三彎嘅老友，中西象棋都啱key。由於要佈局，訓練人凡事睇大局，識大體，有遠見，唔好鑽牛角尖，一旦卒仔俾人「嗒」咗，千祈咪出車同人拼命。

當然，玩康樂棋最平和，冇乜殺氣。發錢寒嘅書友愛玩大富翁，儍下儍下，買完酒店又買幾條街。

捉圍棋要逐粒逐粒放低，最啱睇電視成日轉台，同食即食麪嘅學生哥，訓練忍耐。不過唔少老友認為最激係捉盲棋，亂放一通，盲鬥盲，唔知下一步開乜棋，見一步行一步，十足大多數人嘅生活。

捉棋同讀書做人差唔多，最緊要有棋品。有人棋藝出色，但唔襟激，火遮眼掃晒盤棋，大家收工，從此冇人受佢玩，好唔開心﹗聖經似乎冇提過耶穌捉棋，但耶穌話：「我來了是要叫人得生命，並且得的更豐盛。」即係要賜人開心快樂精彩又有「品」嘅生命啦﹗還有捉棋必須守棋例，飛象過河同偷步，唔會成事，人世間冥冥中有個「公證」，神好公義，人種甚麽就收甚麽。

最後一個領悟，就係捉棋同生活一様，冇take two 。珍惜每個機會，小心每一個抉擇。舉手不回，人一生唔係講玩，聰明仔要好好求主指教，否則行錯棋大喊：「咪住，再嚟過!」就太遲!